Azərbaycan Dövlət Su Ehtiyatları Agentliyi (ADSEA) yanında Suların İstifadəsinə və Mühafizəsinə Dövlət Nəzarəti Xidməti (SİMDNX) su obyektlərində aparılan nəzarət tədbirləri nəticəsində “Balakhanı Operating Company” LTD şirkətinin fəaliyyətində pozuntular aşkar edib.
SİMDNX-dan Baki-baku.az-a verilən məlumata görə, tədbirlər zamanı müəyyən olunub ki, Bakının Sabunçu rayonu, Zabrat qəsəbəsində yerləşən Zabrat gölündə adıçəkilən şirkət tərəfindən bərk və qarışıq süxurlar daşınaraq gölün doldurulması həyata keçirilib.
Faktla bağlı qanunvericiliyə uyğun olaraq akt və İnzibati Xəta haqqında Protokol tərtib olunub, digər toplanmış materiallarla birlikdə Sabunçu rayon Məhkəməsinə təqdim edilib.
Məhkəmənin qərarına əsasən, “Balakhanı Operating Company” LTD şirkəti təqsirli bilinərək barəsində 7 500 manat məbləğində inzibati cərimə tətbiq edilib.
ADSEA bir daha bütün hüquqi və fiziki şəxsləri su obyektlərinin istifadəsi və mühafizəsi sahəsində mövcud qanunvericiliyin tələblərinə ciddi riayət etməyə çağırır.
