Yasamal rayonunda artıq üç ildir ki, istifadəsiz vəziyyətdə olan avtomobil küçədə tullantı kimi qalıb. Ərazidə yaşayan sakinlər dəfələrlə bu vəziyyətdən narazılıqlarını bildiriblər. Onların sözlərinə görə, sözügedən nəqliyyat vasitəsi həm yolun görüntüsünü korlayır, həm də ətrafda antisanitariya halları yaradır.

Baki-baku.az məsələ ilə bağlı aidiyyəti qurumlara müraciət edib.

Qeyd edək ki, unudulmuş köhnə avtomobillərlə bağlı ilk növbədə Dövlət Yol Polisi (DYP) tərəfindən araşdırma aparılır.

Avtomobilin qeydiyyatda olub-olmaması, sahibinin kimliyi və ya qeydiyyatdan çıxarılıb-çıxarılmaması müəyyənləşdirilir. Yalnız bundan sonra həmin nəqliyyat vasitəsinin yığışdırılması, utilizasiya olunması barədə qərar verilir.

Lakin qeyd etdiyimiz avtomobil illərdir orada qaldığından, artıq tullantı formasını aldığından redaksiyamızın müraciətinə cavab Yasamal Mənzil-Kommunal Təsərrüfatı Birliyindən gəldi. Birliyin əməkdaşları tullantının olduğu yerə gedərək həmin avtomobilin yararsız vəziyyətdə olan qalıqlarını ərazidən kənarlaşdırıblar.