Ənənəvi enerji mənbələrinin bərpaolunan enerji ilə səmərəli inteqrasiyası yalnız müasir rəqəmsal infrastruktur və inkişaf etmiş kommunikasiya platformaları vasitəsilə mümkün ola bilər.

Baki-baku.az xəbər verir ki, bu fikirləri Bakıda keçirilən Ümumdünya Şəhərsalma Forumunun 13-cü Sessiyası – World Urban Forum 13 çərçivəsində təşkil olunan “Azərbaycan enerjisisteminin rəqəmsal idarəetmə arxitekturası” adlı tədbirdə çıxışı zamanı AzərEnerji ASC-nin sədr müavini Rüstəm Qasımov bildirib.

Onun sözlərinə görə, müasir enerji sistemlərinin effektiv idarə olunması üçün qabaqcıl rəqəmsal həllərin tətbiqi xüsusi əhəmiyyət daşıyır. O qeyd edib ki, hazırda dünya enerji bazarında ən müasir yanaşmalardan biri hesab olunan yeni nəsil idarəetmə və proqram təminatı sistemi Azərbaycanda da tətbiq edilir.

R.Qasımov vurğulayıb ki, həmin sistem yalnız elektrik şəbəkəsinin monitorinqi və idarə edilməsini deyil, həm də enerji infrastrukturunun modelləşdirilməsi və rəqəmsal analizinə imkan verən 18 müxtəlif aləti özündə birləşdirir.

O əlavə edib ki, rəqəmsal idarəetmə platformaları enerji sistemlərinin dayanıqlığının artırılması və ümumi səmərəliliyin yüksəldilməsində vacib rol oynayır.