Bu gün qlobal şəhərsalma, dayanıqlı tikinti, innovativ materiallar və yaşıl iqtisadiyyat məsələləri dünya gündəminin əsas mövzularındandır. Belə bir dövrdə sektor nümayəndələri arasında əməkdaşlığın genişləndirilməsi, təcrübə mübadiləsinin təşviqi və yeni tərəfdaşlıqların qurulması xüsusi əhəmiyyət daşıyır.

Baki-baku.az xəbər verir ki, bunu BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində keçirilən “Özəl sektor davamlı şəhərlərin hərəkətverici gücü kimi” adlı sessiyada çıxışı zamanı Azərbaycan Tikinti Materialları İstehsalçıları Assosiasiyasının (ATMİA) baş katibi Sevda Quliyeva deyib.

“Dünyada şəhərləşmənin sürətlə artığı bir dövrdə şəhərlərin ekoloji, sosial və iqtisadi baxımdan davamlı inkişafı yalnız dövlət qurumlarının deyil, eyni zamanda, özəl sektorun fəal iştirakı ilə mümkündür. Özəl sektor innovasiya, investisiya və texnoloji imkanları ilə dayanıqlı şəhərlərin formalaşdırılmasında əsas tərəfdaşlardan biri kimi çıxış edir”, – deyə baş katib əlavə edib.