Vezuviy vulkanının 79-cu ildəki dağıdıcı püskürməsindən sonra Pompey tamamilə məhv olmuşdu. Lakin arxeoloqların yeni tapıntıları göstərir ki, bəzi sakinlər fəlakətdən sonra dağıntılar içində yaşamağa davam ediblər.

Baki-baku.az portalı aparılan tədqiqatların nəticələrinə əsasən bildirir ki, şəhərə geri dönənlər arasında həm sağ qalan köhnə sakinlər, həm də yeni məskən axtaranlar və xəzinə ovçuları olublar.

Lakin bu yer klassik Roma şəhəri deyil, infrastruktursuz, çətin şəraitdə qurulan qeyri-rəsmi düşərgəni xatırladıb.

Tədqiqatçılar bildirirlər ki, əsasən binaların üst mərtəbələri yaşayış üçün istifadə olunub, alt mərtəbələr isə anbar və emalatxana kimi yenidən qurulub.

UNESCO-nun Pompey üzrə nümayəndəsi Qabriel Tsuxtriqel bu yaşayış formasını “böyük şəhərin xarabalıqları arasında salınmış bir növ favela” adlandırıb.

Qeyd edək ki, Vezuviy püskürməsi zamanı şəhər əhalisinin 15-20%-i həyatını itirmişdi. Ən ölümcül faktor isə lavadan çox, qaz və kül buludlarının yaratdığı istilik dalğası olmuşdu. Pompey XVI əsrdə ilk dəfə kül qatının altından tapılmışdı.