Mayın 4-ü Vətən müharibəsinin yeganə qadın şəhidi Arəstə Baxışovanın doğum günüdür. Onun adı Azərbaycan tarixində təkcə bir hərbçi kimi deyil, həm də döyüş meydanında insan həyatını xilas edən fədakar bir qadın kimi yaşayır.
Arəstə Kərim qızı Baxışova 1989-cu il mayın 4-də Xaçmaz rayonunun Qımılqışlaq kəndində anadan olub. Erkən yaşlarında həyatın çətinlikləri ilə üzləşib – atası, baş leytenant Kərim Baxışov o, cəmi dörd yaşında olarkən vəfat edib. Buna baxmayaraq, Arəstə təhsilini davam etdirərək 1995–2004-cü illərdə Biləcəri qəsəbəsində yerləşən Şuşa şəhər 3 saylı tam orta məktəbdə oxuyub. Daha sonra Azərbaycan Dövlət Pedaqoji Kollecində ingilis dili üzrə təhsil alıb.
Onun peşə yolu əvvəlcə mülki sahədən keçib. 2018–2019-cu illərdə Azərbaycan Silahlı Qüvvələrinin Mərkəzi Hərbi Klinik Hospitalında tibbi statist kimi çalışıb. Lakin Vətənə xidmət arzusu onu birbaşa hərbi sistemə gətirib. 2019-cu il iyulun 12-dən etibarən Silahlı Qüvvələrin hərbi hissələrindən birində operator vəzifəsində xidmətə başlayıb.
2020-ci ildə başlayan Vətən müharibəsi Arəstənin həyatında dönüş nöqtəsi oldu. O, Füzuli, Zəngilan və Qubadlı istiqamətlərində gedən döyüşlərdə iştirak edərək yaralı hərbçilərə birbaşa döyüş meydanında tibbi yardım göstərirdi. Onun fəaliyyəti sıradan bir xidmət deyildi – bu, ölümün içində həyata sarılmaq, hər an risk altında olsa belə başqalarının yaşaması üçün mübarizə aparmaq idi.
Arəstə Baxışova 23 oktyabr 2020-ci ildə Qubadlı uğrunda gedən döyüşlər zamanı şəhid olub. O, Biləcəri Şəhidlər xiyabanında dəfn edilib. Geridə isə iki övladı – Mərdan və Zəhra yadigar qalıb.
Onun göstərdiyi şücaət dövlət tərəfindən də yüksək qiymətləndirilib. Azərbaycan Prezidenti İlham Əliyevin sərəncamına əsasən, Arəstə Baxışova ölümündən sonra “Vətən uğrunda” medalı ilə təltif olunub. Daha sonra o, beynəlxalq səviyyədə də tanınıb və tibb sahəsində ən nüfuzlu mükafatlardan biri sayılan “Florens Naytingel” medalı ilə təltif edilib.
Arəstə Baxışovanın həyatı və qəhrəmanlığı bir daha göstərir ki, Vətən uğrunda mübarizə yalnız silahla deyil, həm də insan həyatını qorumaqla aparılır. O, döyüş meydanında bir əsgər kimi vuruşdu, bir tibb işçisi kimi həyat xilas etdi və bir ana kimi yadda qaldı.
Xanım Aydın
