Dünya Şəhərsalma Forumu şəhərlərin gələcəyinin necə formalaşacağına dair ən vacib beynəlxalq platformalardan biridir. Burada müxtəlif ölkələrdən gələn nümayəndələr, ekspertlər və mütəxəssislər bir araya gələrək urbanizasiya, dayanıqlı inkişaf və müasir şəhər idarəetməsi mövzularında fikir mübadiləsi aparırlar.

Baki-baku.az xəbər verir ki, bu fikirləri BMT-nin Ümumdünya Şəhərsalma Forumunun 13-cü Sessiyasının (WUF13) rəsmi açılışı ilə bağlı keçirilən mətbuat konfransında forumun milli koordinatoru, Dövlət Şəhərsalma və Arxitektura Komitəsinin sədri Anar Quliyev səsləndirib.

O qeyd edib ki, forum çərçivəsində müxtəlif sessiyalar, tədbirlər və geniş müzakirələr təşkil olunur. Anar Quliyev vurğulayıb ki, bu platformada həm geniş ekspert bilikləri, həm də zəngin təcrübə mübadiləsi formalaşır və bu proses bütün iştirakçılar üçün faydalı nəticələr yaradır.

Komitə sədrinin sözlərinə görə, WUF13 müxtəlif ölkələrin şəhərsalma sahəsindəki təcrübələrinin paylaşılması, innovativ yanaşmaların müzakirəsi və yeni əməkdaşlıq imkanlarının yaradılması baxımından xüsusi əhəmiyyət daşıyır.

“İnanıram ki, burada aparılan bilik və təcrübə mübadiləsindən bütün iştirakçılar faydalanacaq və əldə olunan nəticələr şəhərlərin daha dayanıqlı və inklüziv inkişafına mühüm töhfə verəcək”, – deyə Anar Quliyev bildirib.