Bu forum yalnız konfrans xarakteri daşımır. Burada şəhərsalma siyasətləri ətrafında müzakirələr aparılır, tərəfdaşlıqlar möhkəmləndirilir, həmçinin Yeni Şəhər Gündəliyi və inkişaf məqsədlərinin icrası istiqamətində birgə fəaliyyət həyata keçirilir.

Baki-baku.az xəbər verir ki, bu fikirləri BMT-nin Ümumdünya Şəhərsalma Forumunun 13-cü Sessiyasının (WUF13) milli koordinatoru, Dövlət Şəhərsalma və Arxitektura Komitəsinin sədri Anar Quliyev forum çərçivəsində keçirilən Liderlərin Bəyanatları zamanı səsləndirib.

Anar Quliyev bildirib ki, hazırkı dövrdə şəhərlər artıq qlobal iqlim dəyişikliklərinin əsas təsir mərkəzlərindən birinə çevrilib və məhz buna görə WUF13 xüsusi əhəmiyyət daşıyır.

Komitə sədri vurğulayıb ki, builki forum çərçivəsində Azərbaycan Respublikasının təşəbbüsü ilə ilk dəfə liderlərin, dövlət və hökumət başçılarının görüşü təşkil olunub.

“WUF13-ün Azərbaycanda keçirilməsi ölkəmiz üçün böyük şərəf olmaqla yanaşı, ciddi məsuliyyət də deməkdir. Bu platforma dayanıqlı şəhərsalmanın inkişafı, yenidənqurma prosesləri və şəhər icmalarının dirçəldilməsi baxımından mühüm rol oynayır. Biz bu məqsədlərə həm dialoq, həm də tərəfdaşlıq vasitəsilə nail olmağa çalışırıq”, – deyə Anar Quliyev əlavə edib.