Azərbaycan son beş ildən artıq müddət ərzində regionun müasir tarixində ən geniş əhatəyə malik yenidənqurma proqramlarından birini həyata keçirməkdədir.
Baki-baku.az xəbər verir ki, bu fikirləri Anar Quliyev, World Urban Forum 13-ün milli koordinatoru olaraq forum çərçivəsində keçirilən “Əlaqələndirmənin mərkəzində şəhərlər: şəhər yenidənqurması və regional əməkdaşlıq” adlı tədbirdə çıxışı zamanı bildirib.
O qeyd edib ki, işğal dövründə Azərbaycanın beynəlxalq səviyyədə tanınan ərazilərinin təxminən 20 faizi nəzarətdən kənarda qalıb, yüzlərlə şəhər, qəsəbə və kənd dağıdılıb, mühüm infrastruktur obyektləri məhv edilib, həmçinin mədəni irs ciddi zərər görüb.
Komitə sədri vurğulayıb ki, ərazilərin azad edilməsindən sonra ölkə yeni inkişaf mərhələsinə qədəm qoyaraq yenidənqurma, inteqrasiya və dayanıqlı regional inkişaf istiqamətində genişmiqyaslı fəaliyyətə başlayıb.
A.Quliyev əlavə edib ki, azad olunmuş ərazilər “yaşıl enerji zonası” kimi müəyyən edilib və burada hidroenerji potensialı ilə yanaşı, günəş və külək enerjisi üzrə də böyük imkanlar mövcuddur.
