Bu gün Azərbaycanda məktəblərin həyəti yenidən uşaqların səsi ilə canlanır. Sentyabrın 15-i ölkənin bütün ümumtəhsil, orta ixtisas və ali təhsil müəssisələrində yeni dərs ilinin başlanğıcıdır.
Baki-baku.az xatırladır ki, bu tarix həm də Bilik Günü kimi qeyd olunur. Beləliklə, yay tətilinin uzun günləri arxada qalır, məktəb çantaları çiyinlərə keçir, sinif otaqlarında isə yeni bir tədris ilinin ilk səhifəsi açılır.
Yeni tədris ilində Bakı Şəhəri üzrə Təhsil İdarəsinin tabeliyində fəaliyyət göstərən ümumtəhsil müəssisələrində 504 413 şagirdin təhsil alacağı gözlənilir. Onlardan 39 999-u I sinif, 49 167-si IX sinif, 39 479-u XI sinif, 99-u isə XII sinif şagirdləridir.
Paytaxtda məktəbəqədər təhsil də minlərlə uşağı əhatə edəcək. BŞTİ-nin tabeliyindəki məktəbəqədər təhsil müəssisələrinə 35 043 uşağın, ümumi təhsil müəssisələrinin məktəbəhazırlıq qruplarına isə 17 863 beşyaşlının cəlb olunacağı proqnozlaşdırılır.
Ölkə üzrə isə bu il 132 261 uşaq I sinfə, 89 min uşaq isə məktəbəhazırlıq qruplarına qəbul olunub.
Yeni dərs ilinin yükünü çiyinlərində daşıyan əsas qüvvələrdən biri də, əlbəttə, müəllimlərdir. Bakıdakı ümumi təhsil müəssisələrində 29 715 müəllim, məktəbəqədər təhsil müəssisələrində isə 4 137 tərbiyəçi-müəllim çalışacaq.
Hazırda BŞTİ-nin tabeliyində 729 təhsil müəssisəsi və 9 məktəbdənkənar müəssisə fəaliyyət göstərir.
Sentyabrın 15-i Azərbaycanda təsadüfi seçilmiş tarix deyil. Prezident İlham Əliyevin 21 avqust 2004-cü il tarixli Fərmanına əsasən, ölkədə yeni dərs ili məhz bu gündə başlayır və həmin tarix Bilik Günü kimi qeyd olunur.
Bu gün məktəbə ilk dəfə qədəm qoyan uşaqlar üçün böyük bir başlanğıcdır. Kimi ilk dəfə əlifbanın hərflərini öyrənəcək, kimi yeni dostlar qazanacaq, kimi isə məktəbin son pilləsinə qədəm qoyaraq həyatının növbəti mərhələsinə hazırlaşacaq.
Hər yeni dərs ili bir az da yeni ümid deməkdir. Çünki məktəb yalnız dərslərin keçirildiyi yer deyil — uşaqlığın xatirələrinin, ilk dostluqların, ilk uğurların və gələcəyə aparan arzuların başladığı məkandır.
Yeni dərs ili mübarək! Qoy bu tədris ili hər bir şagird üçün uğurlu, maraqlı və yaddaqalan olsun!
