Bu gün Azərbaycanda minlərlə məktəbdə “Son zəng” səslənir. 2025–2026-cı tədris ilinin başa çatması ilə 116 mindən çox şagird məktəb illəri ilə vidalaşaraq həyatlarının yeni mərhələsinə qədəm qoyur.
Ölkənin bütün ümumi təhsil müəssisələrində keçirilən “Son zəng” tədbirləri məktəb həyətləri və təhsil ocaqlarının ərazilərində təşkil olunur. Bu il ümumilikdə 116 550 məzun üçün son dərs zəngi çalınır. Məzunların 55 954 nəfərini qızlar, 60 596 nəfərini isə oğlanlar təşkil edir.
Bu gün yalnız bir tədris ilinin sonu deyil, həm də minlərlə gəncin gələcək arzularına doğru ilk böyük addımıdır. Onlar müəllimləri, sinif yoldaşları və məktəb xatirələri ilə sağollaşaraq ali təhsil, peşə fəaliyyəti və yeni həyat yollarına üz tuturlar.
Cari ildə işğaldan azad edilmiş ərazilərdə fəaliyyət göstərən təhsil müəssisələrində də “Son zəng” xüsusi əhval-ruhiyyə ilə qeyd olunur. Həmin ərazilərdə yerləşən 25 ümumi təhsil müəssisəsində tədbirlər keçirilir. Onlardan 11 məktəbdə isə ilk dəfə “Son zəng” səslənir. Bu məktəblərin 171 məzunu doğma məktəbləri ilə vidalaşır.
Qeyd edək ki, Azərbaycanda məktəblərdə dərslər 2015-ci ildən etibarən sentyabrın 15-də başlayır və iyunun 14-də başa çatır. Lakin bu il iyunun 14-ü bazar gününə təsadüf etdiyindən “Son zəng” tədbirləri bir gün əvvəl – iyunun 13-də keçirilir.
“Son zəng” hər il olduğu kimi bu il də sevinc, kövrəklik və böyük ümidlərlə müşayiət olunur. Çünki məktəbin son zəngi bir qapının bağlanması deyil, yeni həyatın qapılarının açılması deməkdir. Bu gün çalınan zəng minlərlə gənc üçün uşaqlıq illərinin son akkordu, gələcəyə aparan yolun isə ilk sədasıdır.
