Nyu-Yorkda keçiriləcək hökumətlərarası danışıqlarda BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində səsləndirilmiş fikir və təkliflərin nəzərə alınacağı gözlənilir.
Baki-baku.az xəbər verir ki, bu barədə Polşanın BMT-dəki daimi nümayəndəsi Kriştof Şerski WUF13 çərçivəsində keçirilən “Assambleyaların Birgə Bağlanışı” adlı iclasda çıxışı zamanı bildirib.
O qeyd edib ki, dayanıqlı şəhər inkişafında tərəfdaşlıqlar mühüm rol oynayır və Dayanıqlı İnkişaf Məqsədlərinin yerli səviyyədə həyata keçirilməsi üçün çoxtərəfli əməkdaşlıq vacib şərtlərdən biridir.
Diplomatın sözlərinə görə, yerli və regional idarəetmə orqanları yalnız xidmət təmin edən strukturlar kimi deyil, həm də prosesin əsas tərəfdaşları və aktiv iştirakçıları kimi qəbul olunmalıdır.
Kriştof Şerski dövlət və özəl sektor arasında tərəfdaşlığın vacibliyini vurğulayaraq, özəl sektor üçün stabil və proqnozlaşdırıla bilən mühitin formalaşdırılmasının zəruri olduğunu bildirib. Onun fikrincə, şəhərsalma siyasətlərinin əsasını inklüzivlik, həmrəylik və hesabatlılıq prinsipləri təşkil etməlidir.
