Bu il dünya okeanının səthində temperatur indiyədək aparılan müşahidələr tarixində ikinci ən yüksək göstərici kimi qeydə alınıb.

Baki-baku.az xəbər verir ki, bu barədə Avropa İqlim Dəyişikliyi Xidməti “Kopernik” məlumat yayıb.

Mütəxəssislərin sözlərinə görə, 2025-ci ildə dünya üzrə dənizlərin orta səth temperaturu 20,79 dərəcə təşkil edib ki, bu da ötən il qeydə alınan rekord göstəricidən cəmi 0,14 dərəcə aşağıdır.

Alimlər yüksək səth temperaturunu okeanın atmosferə buraxılan karbon qazının 25-30 faizini və artıq istiliyin təxminən 90 faizini udması ilə izah edirlər. İqlimşünasların fikrincə, məhz bu səbəbdən Dünya okeanı qlobal istiləşmənin əsas təbii tormozlayıcısı olaraq qalır.

Alimlər xəbərdarlıq edirlər ki, bu proses dəniz ekosistemlərində kəskin dəyişikliklərə gətirib çıxara bilər. Xüsusilə, okean sularının isinməsi və turşuluğun səviyyəsinin artması korall poliplərinin kalsium ionlarını və kömür turşusunu mənimsəməsinə mane olur ki, bu da korall riflərinin dağıdılmasına səbəb ola bilər.

İqlimşünasların narahatlıqlarından biri də odur ki, bu proseslər təkhüceyrəli yosunların sürətlə çoxalmasını sürətləndirə və bunun nəticəsində dənizlərin digər sakinlərinin oksigenlə təminatını kəskin şəkildə pisləşdirə bilər.