Bu gün – 26 avqust Azərbaycanda Laçın Şəhəri Günü kimi qeyd olunur.

Baki-baku.az xatırladır ki, bu əlamətdar tarix 2023-cü il iyulun 31-də Prezident İlham Əliyevin imzaladığı sərəncama əsasən təsis olunub və işğaldan azad edilmiş ərazilərdə şəhər günlərinin qeyd olunması ənənəsinin bir hissəsidir.

Sözügedən sərəncamda vurğulanır ki, Ermənistanın hərbi təcavüzü nəticəsində 30 ilə yaxın işğal altında qalmış əzəli torpaqlarımız, 2020-ci ildə baş vermiş 44 günlük Vətən müharibəsində Azərbaycan Ordusunun qəhrəmanlığı və xalqımızın birliyi sayəsində azadlığa qovuşdu.

Tarixi Zəfər nəticəsində Cəbrayıl, Füzuli, Zəngilan, Qubadlı, Hadrut, Suqovuşan və onlarla digər yaşayış məntəqələri düşməndən təmizləndi. Laçın şəhəri isə Qarabağda strateji və rəmzi əhəmiyyətə malik bölgələrdən biri olaraq Azərbaycanın suverenliyinin tam bərpasında mühüm rol oynadı.

2020-ci ilin sonunda əldə olunan razılaşmaya əsasən, Laçın rayonu 2020-ci il dekabrın 1-də Azərbaycana təhvil verildi.

Daha sonra, 2022-ci ilin avqustunda Laçın şəhəri də Azərbaycan Ordusunun nəzarətinə keçdi, şəhərdə dövlət suverenliyi tam şəkildə bərpa edildi.

Bu gün Laçın yalnız bir şəhər deyil, Vətənə qayıdışın, əzmin, zəfərin və dövlət iradəsinin simvoludur.