Bu gün – 20 oktyabr 2025-ci il – Zəngilan şəhərinin erməni işğalından azad edilməsinin 5-ci ildönümüdür. 2020-ci ilin məhz bu günündə, Vətən müharibəsi zamanı Azərbaycan Ordusu böyük strateji uğura imza ataraq, Zəngilan şəhəri və bir sıra kəndləri işğaldan azad etmişdi.

Prezident İlham Əliyev həmin gün X (keçmiş Twitter) sosial şəbəkəsində paylaşdığı rəsmi məlumatla bu tarixi xəbəri xalqa çatdırmış, Zəngilanla yanaşı Füzuli, Cəbrayıl və Xocavənd rayonlarının kəndlərinin də azad olunduğunu bildirmişdi. “Qarabağ Azərbaycandır!” çağırışı həmin gün daha da güclü səslənmişdi.

Zəngilanın azad olunması təkcə hərbi deyil, həm də siyasi və iqtisadi baxımdan mühüm əhəmiyyət daşıyır. Bu hadisə Azərbaycanın ərazi bütövlüyü istiqamətində atdığı həlledici addımlardan biri oldu.

Qeyd edək ki, 2023-cü ildə imzalanmış Sərəncama əsasən, hər il 20 oktyabr “Zəngilan şəhər günü” kimi qeyd olunur.

Zəfər tariximizin bu şanlı səhifəsi xalqımızın yaddaşında daim yaşayacaq.