Mobil telefonları yastığın altına qoyub yatmaq bir çox insanın gündəlik vərdişlərindən biridir. Lakin bu, düşündüyümüz qədər zərərsiz deyil və ciddi təhlükələr yarada bilər.
Baki-baku.az xəbər verir ki, bu barədə Rusiya Texnologiya Universitetinin Praktiki və Tətbiqi İnformatika kafedrasının baş müəllimi Qleb Derevlev Gazeta.ru-ya açıqlamasında danışıb.
Mütəxəssis bildirir ki, smartfonlar işləyərkən və xüsusilə enerji yığarkən (şarj zamanı) istilik ayrılır. Yastığın altına qoyulduqda bu istilik yayıla bilmir və nəticədə cihaz normadan artıq qızır. Bu isə təkcə smartfonun texniki vəziyyətinə deyil, istifadəçinin sağlamlığına da təhlükə yarada bilər.
“İstiliyin yayılmaması batareyada kritik vəziyyət yarada bilər. Bu, alışma və ya partlayış riskini artırır. Əgər aşağı keyfiyyətli şarj cihazı və kabel istifadə olunursa, risk daha da çoxalır,” – deyə Qleb Derevlev xəbərdarlıq edib.
Mütəxəssis əlavə edir ki, uzun müddət qeyri-normal yükləməyə məruz qalan batareyalar şişə bilər və bu da cihazın içərisində ciddi zədələnmələrə səbəb ola bilər. Bundan başqa, bəzi smartfonlar yapışqanla birləşdirildiyindən, həddindən artıq istilik ekranın və daxili hissələrin ayrılmasına yol aça bilər.
Elektromaqnit şüalanma və potensial sağlamlıq riski
Ümumdünya Səhiyyə Təşkilatı mobil cihazlardan yayılan radiotezlik sahələrini mümkün kanserogenlər sırasında qeyd edir. Hərçənd bu sahədə hələ birbaşa xərçənglə əlaqə sübut edilməyib, lakin gecə saatlarında başa yaxın məsafədə telefon saxlamaq hüceyrə funksiyalarına və toxuma temperatur tənzimlənməsinə mənfi təsir göstərə bilər.
Nə etməli?
Mütəxəssis təhlükəni azaltmaq üçün aşağıdakı tövsiyələri verir:
Telefonu uçuş rejiminə keçirmək və ya Wi-Fi, Bluetooth, NFC, mobil internet və geolokasiya funksiyalarını yatmazdan əvvəl söndürmək.
Smartfonu şarjda olarkən yastığa və ya yatağa qoymamaq, onu sərt və havalanan bir səthə yerləşdirmək.
Əgər telefon zəngli saat kimi istifadə olunursa, onu elə uzaq məsafəyə qoymaq ki, zəngi söndürmək üçün yataqdan qalxmaq lazım gəlsin.
Yatmazdan 30-60 dəqiqə əvvəl telefondan istifadəni dayandırmaq, bildirişləri söndürmək və batareyanın vəziyyətini vaxtaşırı yoxlamaq.
Smartfonlar həyatımızın ayrılmaz hissəsinə çevrilsə də, onların düzgün istifadəsi həm cihazın ömrünü uzatmaq, həm də sağlamlığımızı qorumaq baxımından vacibdir. Gecə saatlarında telefonu yataqdan uzaqda saxlamaq, xüsusilə də şarj zamanı yastığın altına qoymamaq, ciddi təhlükələrin qarşısını ala bilər.
