Bu gün – 18 oktyabr 2025-ci il tarixində Azərbaycanın tarixi zəfərlərindən biri olan Xudafərin körpüsünün işğaldan azad edilməsinin 5 ili tamam olur.
Baki-baku.az xatırladır ki, 2020-ci ilin məhz bu günündə, Vətən müharibəsi zamanı Azərbaycan Ordusu Cəbrayıl rayonu istiqamətində uğurlu əməliyyatlar həyata keçirərək, strateji əhəmiyyətə malik olan Xudafərin körpüsünü və ətraf əraziləri erməni işğalından azad etdi.
Prezident İlham Əliyev həmin gün xalqımıza bu müjdəni rəsmi olaraq çatdıraraq, belə demişdi:
“Azərbaycan Silahlı Qüvvələri qədim Xudafərin körpüsünün üzərində Azərbaycan bayrağını qaldırdılar. Eşq olsun Azərbaycan xalqına! Qarabağ Azərbaycandır!”
Qeyd edək ki, Xudafərin körpüsü həm tarixi, həm də strateji baxımdan böyük önəm daşıyır. Onun azad olunması Vətən müharibəsində qazanılan önəmli uğurlardan biri kimi tarixə düşüb.
Hazırda Xudafərin körpüsü və ətrafı bərpa və yenidənqurma işləri ilə yeni həyat qazanır, bölgənin iqtisadi və turizm potensialının inkişafında mühüm rol oynayır.
