Bakının Xətai rayonu, Afiyəddin Cəlilov küçəsində fəaliyyət göstərən “Coffee Nufstro” adlı kafenin qarşısında yerləşən ağacların dibinə yaşıl rəngli süni örtüklər yerləşdirilmişdi. Bu örtüklər dekorativ məqsədlə qoyulmuş olsa da, ətraf mühitə mənfi təsir göstərərək ağacların hava almasına əngəl yaradıb.
Baki-baku.az saytının müraciətindən sonra Xətai rayon Mənzil-Kommunal Təsərrüfat Birliyi tərəfindən əraziyə baxış keçirilib. Dərhal tədbir görülərək süni örtüklər çıxarılıb və ağaclara aqrotexniki qulluq göstərilib.
Xətai MKTB vətəndaşlara çağırış edərək bildirir ki, ictimai ərazilərdə, xüsusilə yaşıllıqların qorunmasında hər kəs məsuliyyətli davranmalı, dekorativ məqsədlə edilən müdaxilələr təbiətə zərər verməməlidir. Bu cür halların təkrarlanmaması üçün monitorinqlər davam etdiriləcək.
