Son zamanlar sosial şəbəkələrdə qeyri-adi dadı və tərkibi ilə diqqət çəkən Dubay şokoladı adlanan desert populyarlıq qazanıb. Lakin məlum olub ki, bu trendin arxasında sağlamlıq üçün ciddi təhlükə gizlənir.
Baki-baku.az bu barədə StarHit.ru-ya istinadən xəbər verir.
Rusiyalı diyetoloq Anna Belousova şirniyyat haqqında şok təfərrüatı açıqlayıb.
“200 qram çəkisi olan bir Dubay şokoladının qida dəyəri min kilokaloridən çoxdur. Belə desert, hətta az miqdarda belə təhlükəli ola bilər”, – deyə mütəxəssis xəbərdarlıq edib.
Onun fikrincə, xüsusilə allergiyası olan insanlar bu şirniyyatdan uzaq durmalıdırlar. Həmçinin diyetoloq öd kisəsi problemi olanların da bu şokoladı yeməməsini tövsiyə edib.
Endokrinoloq Veronika Savenko da həmkarının fikirləri ilə razılaşır. O, diabet və piylənmədən əziyyət çəkən insanları dəbdə olan bu şirniyyatdan imtina etməyə çağırıb.
“Şokoladın tərkibindəki məhsullar ishal və digər mədə-bağırsaq xəstəliklərinə səbəb ola bilər”, – deyə həkim vurğulayıb.
“Bundan əlavə, Dubay şokoladında yağ və şəkərin yüksək tərkibi orqanizmin hüceyrələrinə zərər verən qlikasiya yaradır. Bu, artıq çəkiyə, ürək-damar xəstəliklərinə, ikinci tip şəkərli diabetə və ateroskleroza səbəb ola bilər”, – deyə həkim əlavə edib.
Qeyd edək ki, Dubay şokoladı – yağda qızardılmış kadayif xəmiri, püstə və ya küncüt pastasından ibarət olan xırtıldayan içlikli desertdir.
