Yüz illər boyu Səfəvilərin, Əfşarların, Qacarların, Osmanlı imperiyasının himayəsində olan Pakistan Azərbaycan və Türkiyəyə sevgisini bu gün də davam etdirməkdədir.

Baki-baku.az xəbər verir ki, 1988-ci ildən dövriyyədə olan 1000 rupilik əskinasların üzərində ilk vaxtlar Pakistanın banisi Məhəmməd Əli Cinnahın portreti əks olunmuşdu. 2007-ci ildə Pakistan Mərkəzi Bankı əskinasların dizaynını yeniləmək qərarına gəlir. Yeni dizaynda Cinnahın portreti ilə yanaşı, Pakistan bayrağının təsviri də əlavə olunur.

Lakin məhz bu mərhələdə diqqətdən qaçan texniki bir detal sonradan böyük müzakirələrə səbəb olur. Əskinasların çap prosesi zamanı rəng çalarlarının üst-üstə düşməsi nəticəsində bayrağın yaşılı qırmızı tonlara çevrilir. Yeni 1000 rupilik əskinaslar dövriyyəyə buraxıldıqda, yerli sakinlər bunu dərhal fərq edirlər və etiraz səsləri yüksəlir.

Mətbuat bu məsələni geniş işıqlandırır, ictimaiyyətdə “Pakistan bayrağı niyə qırmızı oldu?” sualı müzakirə mövzusuna çevrilir. Nəhayət, yaranan narazılığa Pakistan rəhbərliyinin müdaxiləsi ilə son qoyulur.

Pakistan Mərkəzi Bankının rəhbəri rəsmi açıqlama verərək, vəziyyətə aydınlıq gətirir: “Bu, Türkiyə Respublikasının bayrağıdır – bizim qardaş ölkənin rəmzidir.”

Beləcə, təsadüfi bir çap səhvi, iki dost ölkə – Pakistan və Türkiyə arasındakı qardaşlıq bağlarını simvolizə edən maraqlı bir tarixi xatirəyə çevrilir. Bu cavabdan sonra narazılığın aradan qalxması isə Pakistan dövləti ilə yanaşı, xalqın da Türkiyəyə olan sevgisinin göstəricisidir.