Moskvanın “Dinamo” klubunun və Avstraliya millisinin sabiq müdafiəçisi Tiana Manqakaya 30 yaşında onkoloji xəstəlik nəticəsində vəfat edib.
Baki-baku.az xəbər verir ki, bu barədə Avstraliya Basketbol Federasiyasının mətbuat xidməti məlumat yayıb.
“Biz Tiana Manqakayanın vəfatı xəbərindən dərindən kədərləndik. O, xərçənglə mübarizəsi zamanı göstərdiyi cəsarəti və dözümü ilə hamımıza ilham verdi”, – deyə bəyanatda bildirilib.
2019-cu ildə həkimlər idmançıya süd vəzisi xərçəngi diaqnozu qoymuşdular. Manqakaya kimyaterapiya, ikitərəfli mastektomiya və rekonstruktiv əməliyyatdan sonra xəstəliyi gerilətmiş və idmana qayıda bilmişdi. Lakin 2023-cü ildə xəstəlik yenidən şiddətlənmiş və o, karyerasını yarımçıq dayandırmaq məcburiyyətində qalmışdı.
2025-ci ilin aprelində o, idmana qayıtdığını elan etsə də, sentyabrın 4-də sağlamlığının kəskin pisləşməsi səbəbindən karyerasını yenidən başa vurduğunu açıqlamışdı. Bundan bir həftə sonra isə dünyasını dəyişdi.
