Bu gün Tərtər rayonunun Suqovuşan qəsəbəsi və Talış kəndinin işğaldan azad edilməsindən 5 il ötür.
Baki-baku.az xatırladır ki, 2020-ci ilin oktyabrın 3-də Azərbaycan Ordusu Müzəffər Ali Baş Komandan İlham Əliyevin rəhbərliyi ilə “Dəmir yumruq” əməliyyatı çərçivəsində bu strateji əhəmiyyətli əraziləri erməni işğalından azad etdi. Bu uğurlu əməliyyatla Suqovuşan və Talış kəndləri uzun illər sonra Vətən müharibəsi zamanı yenidən Azərbaycanın nəzarətinə keçdi.
Suqovuşanın azad edilməsi ilə mühüm təminat yolları və yüksəkliklər ölkəmizin əlində cəmləşdi, bu isə cəbhədə üstünlüyün qorunmasında vacib rol oynadı. Həmin döyüşlərdə düşmən ciddi itkilərə məruz qaldı.
Bu tarixi hadisə Azərbaycan ordusunun gücünü, qətiyyətini və vətənpərvərliyini bir daha nümayiş etdirdi. Suqovuşan və Talışın azad edilməsi həm də bölgədə sülh və sabitliyin təmin olunması üçün mühüm addım oldu.
Azərbaycan Ordusu gün ərzində, həmçinin, Tərtər rayonunun Talış, Cəbrayılın Mehdili, Çaxırlı, Aşağı Maralyan, Şəybəy və Quycaq kəndlərini, Füzulinin isə Aşağı Əbdürrəhmanlı kəndini tamamilə işğaldan azad edir.
Bu gün biz həm Suqovuşanın və Talışın azad edilməsinin 5 illiyini qeyd edir, həm də o günlərin qəhrəmanlarını böyük minnətdarlıqla anırıq. Azərbaycanın suverenliyi və ərazi bütövlüyü uğrunda canını fəda edənlər heç vaxt unudulmayacaq.
