Elə bir məkan təsəvvür edin ki, orada təbiət hər il möhtəşəm tamaşa nümayiş etdirir və nəticədə adi bir park sehrli sualtı aləmə çevrilir.

Baki-baku.az xəbər verir ki, söhbət Avstriyadakı məşhur Grüner – Ze gölündən gedir, hansı ki, hər tərəfdən uca dağlarla əhatə olunub.

Qış fəslində bu gözəl mənzərəli su hövzəsi yalnız 1–2 metr dərinliyə malik olur və onun sahili gəzinti, piknik və foto çəkilişlər üçün ideal zona hesab olunur. Yaz gəldikcə isə, dağlardakı qarlar əriməyə başlayan zaman həmin göl ətrafındakı landşaftı yavaş-yavaş “udmağa” başlayır: may ayında su hövzəsinin dərinliyi 12 metrə çatır ki, bu səbəbdən bir zamanlar sahildə olan ağaclar, yollar və skamyalar şəffaf suyun altında qalır.

Bu unikal fenomen Grüner – Ze gölünü sualtı fotoqrafiya həvəskarları və dalğıclar üçün cazibədar bir məkana çevirir. Onlar su altında qalan parkı tamamilə yeni, mistik formada görmək üçün bu əraziyə gəlirlər. Gölə baxarkən insan özünü əsl möcüzənin şahidi kimi hiss edir – burada təbiət qeyri-adi səhnələr yaradır. Həmin səhnələr fantastik filmlərdə nümayiş etdirilməyə layiqdir.