Son vaxtlar sosial şəbəkələrdə “sürətli kredit”, “girovsuz və zəmanətsiz borc”, “ani pul köçürməsi” kimi elanların sayı artıb.

Baki-baku.az-ın məlumatına görə, bu elanlarda rəsmi bank və ya kredit təşkilatları ilə heç bir əlaqəsi olmayan şəxslər vətəndaşlara cəlbedici şərtlərlə kredit vəd edir.

Əslində isə bu, insanların etibarından sui-istifadə etməklə onların pullarını və şəxsi məlumatlarını ələ keçirmək məqsədi daşıyan dələduzluq sxemləridir.

Mütəxəssislərin fikrincə, vətəndaşlar əsasən tez pul əldə etmək istəyində olduqları üçün bu cür elanlara aldanırlar.

Dələduzlar əvvəlcə müəyyən “təminat ödənişi” və ya “proses xərci” adı ilə pul tələb edir, daha sonra isə yoxa çıxırlar. Digər bir üsul isə saxta anketlər vasitəsilə şəxsi məlumatların – o cümlədən şəxsiyyət vəsiqəsi və bank kartı məlumatlarının ələ keçirilməsidir.

Mütəxəssislər və hüquq-mühafizə orqanları belə hallardan qorunmaq üçün aşağıdakı məsləhətləri verir:

• Rəsmi mənbələrdən istifadə edin – Kredit yalnız lisenziyası olan banklar və qanuni kredit təşkilatları vasitəsilə götürülə bilər.

• Sosial şəbəkə elanlarına inanmayın – “Ani pul”, “faizsiz kredit” vədləri real deyil və aldatma məqsədi daşıyır.

• Öncədən ödəniş etməyin – Kredit almaq üçün heç bir bank müştəridən əvvəlcədən pul tələb etmir.

• Şəxsi məlumatları paylaşmayın – Tanımadığınız şəxslərə şəxsiyyət vəsiqəsi və kart məlumatlarınızı göndərmək təhlükəlidir.

• Şübhəli hallarda polisə müraciət edin – Dələduzluq əlaməti göründükdə dərhal hüquq-mühafizə orqanlarına məlumat verilməlidir.

Qeyd edək ki, sosial şəbəkələrdə yayılan bu cür elanlar nəinki maliyyə itkisinə, həm də şəxsi məlumatların oğurlanmasına səbəb ola bilər. Yeganə doğru yol yalnız rəsmi maliyyə qurumlarına müraciət etməkdir.