Dünya siyasəti tarixində elə hadisələr var ki, sanki Hollivud filmlərindən götürülüb – reallığa bənzəmir. Belə hadisələrdən biri ABŞ-ın 26-cı prezidenti, əfsanəvi şəxsiyyət, ovçu, yazıçı, müharibə qəhrəmanı Teodor Ruzvelt ilə bağlıdır.

1912-ci ildə Ruzvelt yenidən prezidentliyə namizədliyini irəli sürmüşdü. Seçki kampaniyası zamanı, Miluoki şəhərində keçirilən mitinqdə ona atəş açıldı. Güllə onun eynək qutusu və cibindəki 50 səhifəlik çıxış mətnini deşərək sinəsinə dəyib.

Baki-baku.az xəbər verir ki, Ruzvelt səhnəni tərk etmədi və çıxışına davam etdi. O, auditoriyanı gərgin və heyran vəziyyətdə saxlayaraq düz bir saat yarım nitq söylədi.

Onu həyat təcrübəsi – daha dəqiqi, ovçuluq təcrübəsi xilas etdi. O, dərhal anladı ki, ağciyəri zədələnməyib, çünki nə qan öskürməsi, nə də ciddi tənəffüs problemi vardı. Daha sonra həkimlər təsdiqlədilər ki, güllə sinəsində dərinliyə gedib və onu çıxarmaq, yerində saxlamaqdan daha təhlükəlidir. Beləcə, Ruzvelt ömrünün sonuna qədər bədənində güllə ilə yaşadı və əyilməz iradənin, cəsarətin və siyasi rəşadətin simvoluna çevrildi.

Hacı Cavadov