Qızılı gözlü, qar kimi ağ yırtıcılar – onlar nə mifik varlıqlardır, nə də rəssam fantaziyasının məhsulu.
Cənubi Afrikanın məşhur Krüger Milli Parkı və onun ətraf ərazilərində ağ tüklü unikal aslanlar yaşayır. Bu nadir rəng dəyişimi resessiv genin təsiri ilə bağlıdır. Amma vacib bir məqamı qeyd etmək lazımdır: bu aslanlar albinos deyil.
Baki-baku.az portalının məlumatına görə, bu gün dünyadakı ağ aslanların əhəmiyyətli hissəsi fərqli ölkələrin zooparklarında saxlanılır. Bir çox alimlər vaxtilə belə düşünürdülər ki, ağ rəngli aslanlar təbiətdə gizlənməkdə çətinlik çəkəcəklər və buna görə uğurla ov edə bilməyəcəklər. Ancaq müşahidələr bu fikri təkzib edir: savanadakı ağ aslanlar qızılı tüklü qohumlarından heç də geri qalmırlar, ovda eyni dərəcədə məharətlidirlər.
Bu möhtəşəm canlılar təkcə bioloji nadirlik deyil, həm də turistlər, fotoqraflar və təbiətsevərlər üçün gerçək sensasiyadır. Ağ aslan, genetikanın sirrini və təbiətin qüdrətini simvolizə edir, çünki təbiət, müasir dövrdə belə, bizi təəccübləndirməyə davam edir.
Hacı Cavadov
