Son günlərdə müşahidə edilən yağışları avtomatik olaraq uzunmüddətli yağıntı artımı kimi təqdim etmək düzgün deyil. Turizm baxımından əsas məsələ yağışın özü deyil, şəhərin intensiv yağıntıya nə dərəcədə hazır olmasıdır.
Bunu Baki-baku.az-a açıqlamasında “Azərbaycan Hotellər və Restoranlar Assosiasiyası”nın İdarə Heyətinin sədri və “Ekoturizm Assosiasiyası”nın icraçı direktoru Samir Dübəndi deyib.
O bildirib ki, küçələrin su altında qalması, nəqliyyatın dayanması, piyada keçidlərinin və turizm obyektlərinin əlçatmaz olması turist təhlükəsizliyinə, səfər proqramlarına və şəhərin imicinə birbaşa təsir edir.
“İqlimə uyğunlaşma yalnız yağışlarla məhdudlaşmamalıdır. Temperaturun yüksəlməsi və şəhər istilik adası effekti də piyada turizminə, açıq hava tədbirlərinə, enerji istehlakına və qonaqların rahatlığına təsir göstərir. Drenaj və kanalizasiya sistemlərinin yenilənməsi ilə yanaşı, parkların, botanika bağlarının, kölgəli piyada məkanlarının və digər “yaşıl adaların” artırılması, sukeçirən örtüklər, yağış bağları, suyun müvəqqəti toplanması sahələri, yaşıl dam və divarlar tətbiq edilə bilər. Belə məkanlar həm iqlimə uyğunlaşmaya, həm də yeni istirahət və turizm məhsullarının yaradılmasına xidmət edir. Lakin yaşıl həllər drenaj sistemini əvəz etmir və Bakı şəraitində az su tələb edən, küləyə və yüksək temperatura davamlı bitkilərlə qurulmalıdır”, – deyə S. Dübəndi vurğulayıb.
