Hipertoniya (yüksək qan təzyiqi) xəstələrinin yol verdiyi bəzi adi, lakin ciddi səhvlər müalicənin effektivliyinə mənfi təsir göstərir və hətta həyati təhlükə yarada bilər.

Baki-baku.az xəbər verir ki, bu barədə rusiyalı kardioloq-lipidoloq Anastasiya Malçenkova “gazeta.ru”ya açıqlamasında danışıb.

Həkimin sözlərinə görə, hipertoniya xəstələrinin ən çox etdiyi üç kritik səhv bunlardır:

Qan təzyiqi ölçülərkən danışmaq
“Bu, əhəmiyyətsiz görünə bilər, amma danışmaq təzyiqin real göstəricilərindən 4-19 mmHg yüksək çıxmasına səbəb ola bilər. Çarpaz ayaqla oturmaq və ya qolun düzgün yerləşdirilməməsi də nəticələri təhrif edir. Nəticədə, həkim vəziyyəti olduğundan daha ağır qiymətləndirərək, artıq dozada dərman yaza bilər”, – deyə Malçenkova bildirib.

Dərman qəbulunu unutmaq və sonra dozanı ikiqat artırmaq
“Dərmanların təsir müddəti var və onları buraxmaq bədənin müdafiəsini zəiflədir. Dozanı sonradan iki dəfə artırmaq isə qan təzyiqini təhlükəli şəkildə aşağı sala bilər. Bu, beyin, ürək və böyrəklər üçün ciddi riskdir”, – deyə kardioloq xəbərdarlıq edib.

Həkimə getməzdən əvvəl dərman qəbul etməmək
“Bəziləri analiz üçün dərman içməməyin daha yaxşı olduğunu düşünür. Bu, çox yanlış yanaşmadır. Əgər dərmanlar dayandırılmalı olarsa, həkim bunu əvvəlcədən bildirəcək. Özbaşına dərman qəbulunu saxlamaq, yanlış diaqnoz və artıq müalicəyə səbəb ola bilər”, – deyə o əlavə edib.

Mütəxəssis sonda qeyd edib ki, düzgün ölçüm qaydalarına əməl etmək, dərmanları vaxtında və təyin olunan dozada qəbul etmək və həkimlə daimi dialoqda olmaq hipertoniya ilə mübarizədə uğurun əsas şərtləridir.