Soyuqların düşməsi ilə insan orqanizmi yağ yandırma rejiminə keçir və xüsusilə düzgün metabolizmə ehtiyac duyur.
Baku-bakı.az bu barədə rusiyalı nutritsioloq İrina Şimanskayanın “Telegram” kanalına istinadən xəbər verir.
“Yağ yandırma prosesini üçlük idarə edir: hipotalamus, qalxanvari vəzi və böyrəküstü vəzilər. Stres, xroniki xəstəliklər, tələsik və mövsümə uyğun olmayan qidalanma onlara aktiv şəkildə mane olur. Yağ yanmır, enerji yoxdur, əl-ayaq donur, əhval-ruhiyyə sıfırdadır… Termogenezi aktivləşdirən və üçlüyün işini dəstəkləyən isidici qidaları və ədviyyatları rasiona daxil etmək lazımdır. Bu qidalar orqanizm soyuğa və qısa işıqlı günə uyğunlaşarkən payızda gümrah qalmağa kömək edəcək”, – deyə mütəxəssis bildirib.
Termogenezdən ötrü xüsusilə zülal vacibdir. Bu baxımdan qoyun əti, quş əti, balıq rasionun birinci yerinə çıxır. Zülal isti bulyonlar şəklində daha asan həzm olunur və orqanizmi daha yaxşı qidalandırır.
Çuğundur, yerkökü, balqabaq, batat, turp, kartof, kələm, soğan, sarımsaq, daykon, şalğam da faydalıdır. Onların tərkibində lif və immunitet üçün lazım olan karotinoidlər, antioksidantlar, E və C vitaminləri, B qrupu vitaminləri, minerallar, sulforafan var.
Payızda C vitamini ilə zəngin mərcanı da rasiona daxil etmək lazımdır. Bu giləmeyvə immuniteti gücləndirir və bundan əlavə, mədəaltı vəzin işini stimullaşdırır, mədə turşuluğunu artırır, xolesterolu azaldır, oynaq iltihabını aradan qaldırır, sistit zamanı kömək edir.
“Yeməklərə və içkilərə istilik xüsusiyyətləri vermək çox asandır. Məsələn, zəncəfil, sarıkök, qara və acı qırmızı bibər kimi ədviyyatlar əlavə etməklə bunu nail olmaq mümkündür”, – deyə Şimanskaya bildirib.
Qeyd edək ki, daha əvvəl immunoloq Vladimir Bolibok bildirmişdi ki, soyuqdəymə ilə mübarizədə vitaminlərlə zəngin olan və immun sistemini gücləndirən limon və portağal yaxşı kömək edir. Həkim soyuqdəymə ilə mübarizənin digər vasitəsi kimi bal, ədviyyat və otlardan hazırlanan isti içki – sbiteni göstərib.
