“Para” ASC bank olmayan kredit təşkilatı (BOKT) 2025-ci ili 6,232 milyon manat xalis mənfəətlə başa vurub. Halbuki, BOKT 2024-cü ildən 1,202 milyon manat zərərlə çıxmışdı.
Baki-baku.az xəbər verir ki, ötən il “Para”nın vergiyəqədərki mənfəəti 7,072 milyon manat (əvvəlki il zərər olub), mənfəət vergisi ödəmələri isə 840 min manat (əvvəlki il olmayıb) təşkil edib.
Bu il yanvarın 1-nə “Para”nın aktivləri 5,157 milyon manat olub ki, bu da illik müqayisədə 3,6 dəfə azdır. Bunun 155 min manatı müştərilərə verilmiş kreditlərdir. 2025-ci ildə BOKT-un kredit portfeli 66,9 dəfə kiçilib.
Hesabat dövründə kredit təşkilatının öhdəlikləri 2,1 dəfə azalaraq 18,063 milyon manata, balans kapitalının çatışmazlığı isə 32,6 % azalaraq 12,905 milyon manata düşüb.
Xatırladaq ki, “Para” 2016-cı ildə lisenziyası ləğv olunmuş “Parabank” ASC-nin bazasında 2017-ci ildə yaradılıb. Onun nizamnamə kapitalı 29,266 milyon manatdır. BOKT-un səhmlərinin 19%-i Eldar Quliyevə, 16% Alevtina Quliyevaya, 13%-i Tamilla Hacıyevaya, 12%-i Vəli Quliyevə, 11%-i Elnur Quliyevə, 8%-i Fərman Quliyevə, 6%-i Əşrəf Səfərova, 6%-i Faiq Səfərova, 4%-i Rasim Poladova. 2%-i İbrahim Səfərova, 2%-i Əvəz Səfərliyə, 2%-i isə digər şəxslərə məxsusdur.
