Təbiət aləmində aldadıcı davranışlar təkcə hiylə deyil, həm də yaşamaq üçün bir vasitədir. Əgər bir çox heyvanlar yırtıcılardan qorunmaq üçün özlərini ölü kimi göstərirlərsə, Afrikada yaşayan nimboxromis balığı bu hiylədən əksinə – ov üçün istifadə edir.

Baki-baku.az xəbər verir ki, Malavi gölünün bu qeyri-adi sakini tam bir “ölüm səhnəsi” nümayiş etdirir: suyun dibinə uzanır, yan çevrilir və tərpənmədən qalır. Bədəni elə görünür ki, guya çürüməkdə olan ölü bir balıqdır – üstü marmor ləkələrlə örtülüb. Bu mənzərəni görən kiçik balıqlar “asanca yem” tapdıqlarını düşünüb ona yaxınlaşırlar… Elə bu anda “meyit” qəfil canlanır, ildırım sürəti ilə irəli atılır və ovunu udur.

Alimlər bu davranışı “ov məqsədli tanatoz” adlandırırlar – yəni ölü kimi davranaraq ovlama strategiyası. Bu fenomen olduqca nadirdir. Əksər heyvanlar tanatozdan yalnız müdafiə məqsədilə istifadə edirlər, hücum üçün yox. Nimboxromis isə bu hiyləgər davranışı incəsənət səviyyəsinə qaldırıb – o qədər inandırıcı tərpənməz qalır ki, təcrübəli tədqiqatçılar belə onun oyununu dərhal başa düşə bilmirlər.

Sualtı aləmdə, harada ki ən ağıllı sağ qalır, nimboxromis sübut edir: təbiət təkcə amansız deyil, həm də inanılmaz dərəcədə yaradıcıdır. Bəzən qalib gəlmək üçün sadəcə… ölü kimi görünmək kifayətdir.