Son illərdə Azərbaycanın demək olar bütün iqtisadi-coğrafi bölgələrində turizm potensialının canlandırılması istiqamətində işlər görülüb. 2025-ci ildə ölkə üzrə daxili səfərlərin əksəriyyəti ənənəvi olaraq Bakı və Abşeron bölgəsindən digər regionlara doğru olub.

Bu barədə Baki-baku.az-a DAİR Hotellər və Restoranlar Assosiasiyasından məlumat verilib.

Bildirilib ki, xüsusən yay aylarında Qəbələ, Quba-Qusar (Şahdağ), Şəki-Zaqatala, Qusar, Lənkəran-Astara kimi bölgələr paytaxtdan gələn turistlərlə zəngin olub. Qış turizmi sahəsində də 2025-ci ildə əhəmiyyətli hadisələr baş verdi: Şahdağ Turizm Mərkəzi 2025-ci il mövsümündə rekord ziyarətçi qəbul etdi.

Rəsmi məlumata görə, 2025-ci ilin 1 yanvar – 15 dekabr tarixləri arasında Şahdağ qış-yay turizm kompleksinə 300 mindən çox ziyarətçi səfər edib. Bu, həm Şahdağın ildən-ilə artan populyarlığını, həm də ümumilikdə daxili turizmin genişlənməsini göstərir. Şahdağ və digər dağ kurortlarında hotel infrastrukturunun genişləndirilməsi, yeni xizək kanat yollarının, qar generatorlarının quraşdırılması kimi investisiyalar 2025-ci ildə də davam edib. Məsələn, Şahdağda qış mövsümü qabağı 2 yeni lift bazası, 7 km uzunluğunda yeni xizək zolaqları istifadəyə veriliblər. Bu addımlar nəticəsində 2026-cı ilin qış mövsümündə orada hətta Avropa və dünya çempionatları kimi beynəlxalq xizək yarışlarının keçirilməsi planlaşdırılır. Yəni daxili turizm infrastrukturu təkcə yerli deyil, həm də beynəlxalq turizmə xidmət edəcək səviyyəyə yüksəlir.