Oksford İngilis Dili Lüğəti “beyin çürüməsi” (brain rot) ifadəsini 2024-cü ilin sözü elan edib.
Baki-baku.az bu barədə Oksford Universiteti nəşriyyatının (Oxford University Press) mətbuat xidmətinin məlumatına istinadən xəbər verir.
Məlumata görə, lüğət “beyin çürüməsi”ni belə izah edir: “əsasən trivial və ya primitiv hesab edilən materialın (xüsusilə onlayn kontent) həddindən artıq istehlakının nəticəsi kimi qəbul edilən zehni və ya intellektual vəziyyətin güman edilən pisləşməsi”. Qeyd olunur ki, son bir ildə bu söz lüğətdə əvvəlkindən 230% daha çox axtarılıb.
Bildirilib ki, “beyin çürüməsi” sözünün ilk istifadəsi 1854-cü ildə amerikalı yazıçı Henri David Toro (1817-1862) tərəfindən “Volden, yaxud meşədə həyat” (Walden; or, Life in the Woods) kitabında qeydə alınıb. Son aylarda bu söz sosial şəbəkələrdə sürətlə populyarlaşıb və bloqerlərin və jurnalistlərin daimi leksikonuna daxil olub.
Qeyd edək ki, ilin sözü “Oxford University Press” ekspertləri tərəfindən nəşriyyatın saytında onlayn səsvermənin nəticələri nəzərə alınmaqla seçilib.