Beynəlxalq alimlər qrupu maraqlı nəticəyə gəlib: musiqi təkcə emosiyaları oyatmaqla kifayətlənmir, həm də yaddaşımızın hansı detallara diqqət yetirəcəyinə təsir edir. Tədqiqat göstərir ki, musiqi dinlədikdən sonra yaranan emosional gərginlik yaddaşın “qlobal” (ümumi) və ya “detallı” (incə detallar) qavrayışını dəyişdirə bilir.

Baki-baku.az xəbər verir ki, araşdırma “The Journal of Neuroscience” jurnalında dərc olunub. Təcrübədə 130 tələbə iştirak edib. İştirakçılar gündəlik əşyaların şəkillərinə baxdıqdan sonra üç qrupa bölünüb: bir qrupa klassik musiqi dinlədilib, digərlərinə neytral səslər və ya sükut təqdim olunub. Daha sonra onlardan şəkilləri yenidən tanımaq, əvvəlki və yeni şəkilləri fərqləndirmək tələb olunub.

Nəticələr göstərib ki, yaddaşın keyfiyyətinə musiqinin janrı yox, yaranan emosional gərginlik səviyyəsi təsir edir. Orta dərəcədə gərginlik hiss edənlər incə detalları daha yaxşı xatırlayır, yüksək gərginlik və ya əksinə, gərginliyin azalması isə yaddaşda yalnız ümumi kontekstin qalmasına səbəb olur.

Alimlər vurğulayırlar ki, bu kəşf yaddaş və əhval pozğunluqları ilə bağlı terapiyaların inkişafına yeni yanaşmalar gətirə bilər. Lakin musiqiyə reaksiyanın çox fərdi olduğu da qeyd olunub – klassik musiqi hər kəsdə eyni emosiyaları yaratmayıb.

Bu araşdırma musiqinin psixologiya və nevrologiya sahəsindəki təsirini daha yaxşı anlamağa imkan verir və gələcəkdə terapiyalarda fərdi yanaşmaların əhəmiyyətini önə çəkir.