PSJ-nin baş məşqçisi Luis Enrike UEFA Çempionlar Liqasının ümumi mərhələsinin 2-ci turunda “Barselona” ilə qarşılaşmazdan əvvəl katalon klubunun yarımmüdafiəçisi Pedri barədə fikirlərini bölüşüb.

Baki-baku.az “Sport.es” portalına istinadən xəbər verir ki, təcrübəli mütəxəssis ispan futbolçunu Harri Poterə bənzədib.

“Düşünürəm ki, Pedri məni çox yaxşı tanıyır. Mənim üçün Pedri – Harri Potterdir. Ümid edirəm ki, sabah özü ilə sehr çubuğunu gətirməyəcək. Biz onun rolunu mümkün qədər az əhəmiyyətli etmək üçün əlimizdən gələni edəcəyik.

Amma o, mütləq oyunun içində olacaq, çünki “Barselona” yalnız Pedridən ibarət deyil. Burada De Yonq, Kubarsi, Lamin (Yamal)… var. Bu oyun – həm topa sahib olanda, həm də topsuz vəziyyətdə çox yaxşı oynayan bir komandaya qalib gəlmək üçün böyük stimuldur”, – deyə Enrike əlavə edib.

Qeyd edək ki, qarşılaşma 1 oktyabrda Barselonadakı “Olimpik Lluís Companys” stadionunda keçiriləcək.