Ürək-damar xəstəlikləri dünyada aparıcı ölüm səbəblərindən biri olaraq qalır. Xüsusilə 45-55 yaş arası kişilər bu risk qrupunda başı çəkir. Niyə məhz kişilər? Bu sualın cavabını rusiyalı kardioloq Natalya Qavrilyuk açıqlayıb.

Baki-baku.az bu barədə KP.ru-ya istinadla xəbər verir.
Həkim bildirib ki, artıq kişinin kişi olaraq doğulması belə ürək-damar problemi riski üçün ciddi göstəricidir. Bunun əsas səbəbi hormonal sistemin fərqliliyidir:

“Kişilərdə androgenlərin (kişi hormonlarının) təsiri altında damar sisteminə daha çox yüklənmə olur. Bu da infarkt və insult riskini artırır”, – deyə kardioloq qeyd edib.

Bundan əlavə, kişilər emosiyalarını ifadə etməyə azad deyillər, bu isə uşaq yaşlarından başlayaraq daxili stresin toplanmasına səbəb olur. Gərginlik artdıqca bir çox kişi siqaret, alkoqol və qeyri-sağlam vərdişlərə yönəlir ki, bu da ürək və damar sağlamlığını daha da zəiflədir.

Ən təhlükəlisi isə budur:
Kişilər həkimə getməkdə gecikir, simptomları ciddiyə almırlar və nəticədə xəstəlik kritik mərhələyə çatanda müdaxilə olunur.

Natalya Qavrilyukun sözlərinə görə, bu faktorlar birlikdə kişilərdə infarkt və insultun qəfil və ölümcül olma riskini artırır.