Səhra həyatının sərt və amansız qanunları var. Günəş yandırır, hava rütubətsizdir, torpaq çatlayır. Lakin bütün bu şəraitin içində yaşamağı bacaran bir möcüzə var ki, onun adı kaktusdur. Onlar suyun yoxluğuna qarşı dözümün, səssiz mübarizənin simvoludurlar.

Baki-baku.az xəbər verir ki, kaktusların ən heyrətamiz xüsusiyyəti onların su saxlamaq qabiliyyətidir. Digər bitkilər bir neçə gün susuz qala bilməzkən, kaktuslar illərlə yağışsız yaşaya bilir. Onların sirri daxili quruluşundadır. Kaktusların kökləri səthin altında genişlənir və ən kiçik rütubəti belə hiss edərək sorur. Yağış yağanda bu köklər sürətlə suyu çəkir, bitkinin ətli gövdəsi isə bu suyu “anbar” kimi içində saxlayır.

Bu anbar, yəni kaktusun gövdəsi sadəcə su ilə dolu bir qab deyil, həm də mühəndis dəqiqliyi ilə qurulmuş təbii sistemdir. Gövdənin içi süngər kimi quruluşa malikdir. Belə ki, suyu udur, saxlayır və tədricən sərbəst buraxır.

Hətta günəş altında uzun müddət qalanda belə kaktus su itkisinin qarşısını almaq üçün buxarlanmanı minimuma endirir.

Təbiət kaktuslara xüsusi bir “zireh” də verib. Onların səthi mumlayıcı qatla örtülüdür və bu qat havadakı rütubətin itirilməsinə maneə olur. Yarpaqları isə tikanlara çevrilərək həm buxarlanmanı azaldır, həm də kaktusu heyvanlardan qoruyur.

Sahra kaktusları yağış zamanı su toplayır. Yağışın səsi səhrada həyatın başlanğıcı kimidir. Damcılar torpağa dəyəndə, kaktus kökləri dərhal oyanır və hər bir damcıdan faydalanmağa çalışır. Bu qısa, amma möcüzəvi an kaktus üçün illərlə yaşamaq deməkdir.