İtaliyanın ən böyük stadionu olan “San Siro” söküləcək.
Baki-baku.az bu barədə “La Gazetta Della Sport”a istinadən xəbər verir.
Məlumata görə, Milan Şəhər Şurası 81 min yerlik arenanın sökülməsi hüququ əldə edib. Bu qərar növbəti iclasda səs çoxluğu ilə qəbul edilib – 24 seçici söküntünün lehinə, 20 seçici isə əleyhinə səs verib.
Bildirilir ki, “San Siro”nun yerində yeni stadion tikiləcək. Meydança 2032-ci ildə İtaliya və Türkiyədə eyni vaxtda keçiriləcək Avropa çempionatının oyunlarına ev sahibliyi edəcək.
Qeyd edək ki, “San Siro” stadionu 1926-cı ildə açılıb. A Seriyasının klubları “Milan” və “İnter” ev oyunlarını burada keçirirlər. 2026-cı ildə Milan və Kortina d’Ampezzo şəhərlərində Qış Olimpiya Oyunlarına ev sahibliyi edəcək. Fevralın 6-na planlaşdırılan açılış mərasimi bu stadionda baş tutacaq. Oyunlar fevralın 22-də başa çatacaq.
