İspaniya Krallığı Futbol Federasiyasının (RFEF) rəsmi portalında “Kolindres”in qapıçısı Raul Ramirezin ölüm xəbəri yayımlanıb.

Baki-baku.az-ın məlumatına görə, 19 yaşı olan gənc futbolçu İspaniyanın beşinci divizionunda keçirilən oyunda aldığı zədə nəticəsində həyatını itirib.

Şənbə günü keçirilən matç zamanı Ramirezin ciddi baş-beyin travması alıb və bu, onun ürəyinin iki dəfə dayanmasına səbəb olub. Birinci dayanma meydanda, ikinci isə tibbi müəssisəyə aparılarkən baş verib.

Hadisə anında “Kolindres”in məşqçisi Rafa de la Pena dərhal süni tənəffüs tətbiq edib. Bundan əlavə, hadisə yerində olan və tibb tələbəsi olan bir azarkeş təcili yardım gələnə qədər futbolçunu həyata qaytarmağa çalışıb,

Bazar ertəsi günü Ramirez Santander şəhərində yerləşən xəstəxananın reanimasiya şöbəsində vəfat edib.