2022-ci ildə dünya əhalisinin sayı 8 milyard nəfəri keçdi. Qlobal əhali artımı tempi tədricən azalsa da, demoqraflar təxmin edirlər ki, təxminən 2037-ci ilə qədər daha bir milyard artım olacaq. Bu artımın təxminən yarısı cəmi 10 ölkənin payına düşəcək. Hansı ölkələr? Cavab Visual Capitalist portalında dərc edilmiş infoqrafikada verilir.
BMT ekspertlərinin 2024-cü ilin sentyabr ayına olan proqnozlarına görə, növbəti 13 il ərzində ən çox əhali artımı Hindistanda olacaq – ölkənin əhalisi 2037-ci ilə qədər təxminən 147 milyon nəfər artaraq 1,6 milyard nəfəri keçəcək. İkinci yerdə Nigeriya (+65 milyon), üçüncü yerdə isə Pakistan (+59 milyon) gəlir. Mütləq əhali artımına görə ilk beşliyə həmçinin Demokratik Kongo Respublikası (+51 milyon) və Efiopiya (+46 milyon) daxildir.
Asiya və Afrika ölkələri reytinqin ikinci beşliyində də üstünlük təşkil edir. Belə ki, 2037-ci ilə qədər Tanzaniyada 28 milyon, Banqladeş və İndoneziyada 25 milyon, Misirdə isə 23 milyon nəfər artım olacaq. Onluğu ABŞ tamamlayır ki, burada 13 il ərzində əhalinin sayı 21 milyon nəfər arta bilər. Ümumilikdə, sadalanan on ölkə dünya əhalisinə 490 milyon nəfər “əlavə edəcək”.
Yəqin ki, bir çoxları siyahıda Çinin olmadığına diqqət yetirdi. Çin 2023-cü ilin əvvəlində dünyanın ən çox əhalisi olan ölkəsi statusunu itirərək birinciliyi Hindistana verdi. Çinin əhalisi 2021-ci ildə pik həddə çatdı və 2022-ci ildə azalmağa başladı. Bununla əlaqədar olaraq, ölkə rəhbərliyi iqtisadiyyat üçün ciddi problemlər yarada biləcək aşağı doğum nisbətini artırmaq yollarını axtarır.
2037-ci ildən sonra dünya əhalisinin artımına gəldikdə isə, ekspertlərin fikirləri fərqlənir. Məsələn, BMT hesab edir ki, insan populyasiyası təxminən 2056-cı ilə qədər 10 milyard nəfərə çatacaq və 2100-cü ildə dünyada təxminən 11 milyard insan yaşayacaq. Eyni zamanda, 2020-ci ildə “The Lancet” jurnalında dərc edilmiş amerikalı tədqiqatçıların məqaləsində deyilir ki, dünya əhalisi 2064-cü ildə 9,7 milyard nəfərlə pik həddə çatacaq və sonra tədricən azalmağa başlayacaq. Nəticədə, 2100-cü ilə qədər Yer kürəsində 6,3 milyarddan 8,8 milyard nəfərə qədər insan yaşayacaq.
Mənbə: vokrugsveta.ru
