Münasibətlərdə həddindən artıq ideal görünən rəftar insanda qıcıq yarada bilər.

Baki-baku.az-ın məlumatına görə, bu barədə psixoloqlar həyəcan təbili çalıblar.

Ekspertlər hesab edir ki, çox düzgün və münaqişədən uzaq olan insanın davranışları bəzən şəxsi azadlığa təhlükə kimi qəbul edilir və bu da daxili müqavimət doğurur.

Belə münasibətlər sakit, sabit və mübahisəsiz olsa da, bir çox insana onlar darıxdırıcı görünə bilər. Xüsusən də, seriallarda və ya filmlərdə tez-tez rast gəlinən dramatik, emosional süjetlərlə müqayisədə bu münasibətlər “boş” və ya yetərincə maraqlı deyilmiş kimi görünür. Bu isə qarşı tərəfdə məmnuniyyətsizlik hissi yaradır.

Digər tərəfdən, insanlarda şüuraltı olaraq öyrəşdikləri münasibət modelinə meyl olur. Məsələn, kiminsə uşaqlığında sevgi daim konfliktlərlə müşayiət olunubsa, böyüdükdə də bu model onun üçün daha “tanış” və “normal” görünür. Belə vəziyyətdə ideal cütün sakit davranışı süni, hətta narahatlıq doğuran bir hal kimi qəbul edilə bilər. Bundan əlavə, “həddindən artıq düzgün” münasibət insanın öz nöqsanlarını daha qabarıq şəkildə hiss etməsinə səbəb ola bilər ki, bu da əlavə gərginlik yaradır.

Mütəxəssislər belə hallarda münasibətlərdə açıq ünsiyyətin vacibliyini vurğulayırlar. İnsanlar öz hisslərini bölüşməli, bir-birlərinin qeyri-ideallığını qəbul etməli və münasibətə kiçik yeniliklər qatmalıdırlar. Çünki gerçək yaxınlıq yalnız tərəflərin özlərini sərbəst və olduğu kimi göstərə bildikləri zaman yaranır, ideala uyğunlaşmağa çalışdıqları zaman yox.

Xoşbəxt münasibət ideal görünməkdən çox, real olmaq, bir-birini olduğu kimi qəbul etmək və birlikdə həyatın rəngarəngliyini yaşamaqla mümkündür.