Koroğlu Rəhimov küçəsindən, “SOCAR” yanacaqdoldurma məntəqəsinin yanından “Gənclik Mall” istiqamətinə gedən qısa yol bağlı saxlanılır.

Baki-baku.az xəbər verir ki, əvvəllər açıq olan və Azərbaycan İdman Akademiyasının arxa hissəsindən keçən həmin yol bir müddətdir darvaza ilə bağlanıb. Yolun girişində duran mühafizəçilər isə bu ərazinin Akademiyaya məxsus olduğunu əsas göstərərək, keçidi təmin etmirlər.

Qısa yolun bağlanması isə nəqliyyatın hərəkətini çətinləşdirir, piyadalar və sürücülər daha uzun məsafə qət etməyə məcbur olur.

Sürücülər bir müddətdir ki, məsələ ilə bağlı aidiyyəti dövlət qurumlarına müraciət ediblər. Məsələnin araşdırılacağı və lazımi tədbirin görüləcəyi vəd olunsa da, hazırda heç bir tədbir görülməyib.

Mövzu ilə bağlı Azərbaycan Yerüstü Nəqliyyat Agentliyinə sorğu göndərsək də müraciətimiz cavabsız qaldı.