Bakı küçələrinin adlarını daşıyan şəxslərdən biri də General Məmmədşərif Həmidovdur. Bəs biz Məmmədşərif Həmidovun kim olduğunu bilirikmi?
Baki-baku.az həmin şəxsiyyətin kimliyini təqdim edir.
Məmmədşərif Həbibulla oğlu Həmidov 1917-ci il fevral ayının 23-də Şəki şəhərində anadan olub. O, 1929-cu ildən Nuxanın (Şəki) İpəksarma müəssisələrində, 1937-1940 illərdə Şəki komsomol və partiya komitələrində işləyib. 1940-cı ildən sovet ordusunda xidmət edib. Böyük Vətən müharibəsində vzvod komandirinin köməkçisi, batalyon qərargahının rəisi, diviziya qərargah əməliyyatının bölmə rəisinin köməkçisi olub. M.Həmidov 1945-ci ildə Ali zabitlər məktəbini bitirib. Hərbi təhsilini başa vurduqdan sonra, o, 1949-1956-cı illərdə Xaçmaz rayon hərbi komissarlığında şöbə rəisi, 1956-1960-cı illərdə Bakı şəhəri Hərbi Komissarı vəzifələrində çalışıb. 1960-cı ildə Azərbaycan Dövlət Universitetinin Tarix fakültəsini bitirib. 1960-1969-cu illərdə Azərbaycanın Hərbi Komissarı olub. Məmmədşərif Həmidov 2-ci dərəcəli “Vətən müharibəsi” ordeni, 2 “Qırmızı Ulduz” ordeni və medallarla təltif edilib.
Hərbi xadim, general-mayor Məmmədşərif Həbibulla oğlu Həmidov 1969-cu ildə vəfat edib, Birinci Fəxri xiyabanda dəfn olunub. Həlak olduğu yerdə – Goranboy-Gəncə avtomobil yolu kənarında xatirə abidəsi qoyulub. Bakı şəhərində adına küçə (keçmiş 4-cü Alatava), gəmi, Şəkidə isə məktəb var.
