İki dövlətin sərhədində, Bidasoa çayının ortasında xırda bir torpaq parçası – Fazan adası yerləşir. İlk baxışda heç bir ciddi fərqi yoxdur: orada kimsə yaşamır, turistlərə giriş qadağandır, ərazi isə demək olar ki, bütövlükdə yaşıllıqla örtülüb. Məhz bu kiçik adada bir neçə əsr bundan əvvəl tarix yazılıb: 1659-cu ildə orada Fransa ilə İspaniya arasında uzunmüddətli müharibəyə son qoyan Pireney sülh müqaviləsi imzalanıb.

Baki-baku.az xəbər verir ki, həmin vaxtdan ada unikal status qazanıb – kondominimum (beynəlxalq hüquqda eyni ərazinin bir neçə dövlət tərəfindən ortaq idarə edilməsi). Adanın idarəedilməsində hər 2 ölkə iştirak edir: altı ay ərzində adanı İspaniyanın İrun şəhəri, növbəti altı ay isə Fransanın Anday şəhəri idarə edir. Həmin qayda hər bu minvalla davam edir – diplomatik birgəyaşayışın ritmini ölçən saatın əqrəbi kimi.

Bu qəribə, eyni zamanda möhtəşəm qayda keçmiş rəqiblərin müharibəsiz hakimiyyəti bölüşməyin yolunu tapmasının simvoluna çevrilib. Bu gün Fazan adası Avropanın ən qeyri-adi məkanlarından biridir – coğrafiya elmi burada hər birimizə xatırladır ki, bəzən kiçik bir torpaq parçası sülhə dayaq olur.