Mütəxəssislər bildirirlər ki, virus infeksiyası keçirən şəxslə eyni evdə yaşayanlar müəyyən gigiyena və qoruyucu qaydalara əməl etməklə yoluxmadan qoruna bilərlər.

Baki-baku.az-ın məlumatına görə, əgər evdə ikinci otaq varsa, xəstəni orada yerləşdirmək və ünsiyyəti minimuma endirmək məsləhət görülür.

İmkan daxilində yardım və ünsiyyət qapı arxasından edilməlidir. Xüsusilə yaxın təmasda, üz-üzə uzun danışıq zamanı yoluxma riski artır, buna görə də bu cür vəziyyətlərdən çəkinmək lazımdır.

İkinci otaq olmadığı halda da xəstəni müəyyən qədər izolyasiya etmək, mümkün qədər ayrı saxlamaq tövsiyə olunur. Sağlam ailə üzvlərinə isə maskadan istifadə etmək, burun boşluğunu qoruyan nazal filtr və ya digər qoruyucu vasitələrdən istifadə etmək, yəni selikli qişaların müdafiəsini təmin etmək məsləhət görülür.

Mütəxəssislərin fikrincə, bu sadə addımlar gündəlik həyat tərzinə tətbiq edildikdə yoluxma riskini əhəmiyyətli dərəcədə azaltmaq mümkündür.

Bundan əlavə, havalandırmaya diqqət etmək, tez-tez əl yumaq, fərdi gigiyena qaydalarına riayət etmək və immuniteti gücləndirən qidalanmaya üstünlük vermək də vacibdir.