Bəzi buşmenlər hələ də elə bir ov üsulu tətbiq edirlər ki, bu zaman onlar sadəcə olaraq qurbanlarını bir neçə saatlıq qaçışla taqətdən salırlar.

Baki-baku.az portalının yazdığına görə, heyvan (məsələn, antilopa) əvvəlcə asanlıqla ovçudan qaçır, lakin ovçu onu izləyir və yenidən yaxınlaşır, nəhayət heyvan tamamilə gücdən düşür. Nəzəriyyəyə görə, məhz uzunməsafəli qaçışa dözümlülük insanların əcdadlarının leş yığmaqdan təzə ət ovuna keçməsinə şərait yaradıb. Skelet-əzələ uyğunlaşmalarından əlavə, insanların uğurunun əsas amili kimi qaçış zamanı tərləmə yolu ilə həyata keçirilən termorequlyasiya göstərilir. Bir çox heyvan növləri nəfəsini bərpa etmək üçün dayanmağa məcbur olur. Bu nəzəriyyəyə əsasən, məhz insan planetin ən uzun məsafə qaça bilən canlısı hesab olunur.