Noyabrın 10-dan etibarən Avropa İttifaqı (Aİ) ölkələrindən olmayan səyahətçilər Aİ-nin sərhədlərində tamamilə yeni prosesə öyrəşməli olacaqlar. Şengen zonası Aİ-yə daxil olmayan vətəndaşların giriş və çıxışlarını elektron şəkildə qeyd etmək üçün nəzərdə tutulmuş Giriş/Çıxış Sistemini (EES) tətbiq edəcək.
AZƏRTAC xəbər verir ki, ilkin olaraq 2022-ci ilə planlaşdırılan EES-nin işə salınması müxtəlif İT problemləri və quru, dəniz, hava sərhəd-keçid məntəqələrində avtomatlaşdırılmış maneələrin gec quraşdırılması səbəbindən artıq bir neçə dəfə təxirə salınıb. Nəqliyyat operatorları, liman və hava limanı rəhbərləri artıq səslərini ucaldırlar. Onlar əlavə gecikmələrdən ehtiyatlanırlar.
Bildirilir ki, “Paris-2024” Olimpiya və Paralimpiya Oyunlarına görə yay mövsümündə heç bir sınaq keçirilmədiyi üçün sistemin səmərəliliyi ilə bağlı qeyri-müəyyənlik mövcuddur. Bununla belə, bir çox ölkələr EES sistemini işə salmağa hazır olduqlarını iddia ediblər.
Qeyd edilir ki, EES sistemi bütün sərhəd keçid məntəqələrində, Şengen zonası ölkələrinin beynəlxalq hava limanlarında, eləcə də Fransa və Böyük Britaniya arasında hərəkət edən “Eurostar” sürət qatarı üçün vağzalda yerləşdiriləcək. Bu aparatlar pasportları və ya digər səyahət sənədlərini skan etməyə imkan verəcək. “Eurostar” şirkətinin məlumatına görə, Böyük Britaniyadakı “St Pancras” və Parisdəki “Gare du Nord” stansiyalarını üçün büdcə 10 milyon avrodan çox olub.
EES sistemi səyahətçilərə sərhədi keçməzdən əvvəl pasportların skanı və biometrik məlumatlarla bağlı özünəxidmət köşklərini təqdim edəcək. Bu yeni protokol pasporta əl ilə möhür vurma sistemini əvəz etmək, giriş və çıxış prosesini daha təhlükəsiz və səmərəli etmək məqsədi daşıyır. Bununla belə, bu transformasiya rəqəmsal texnologiyaları o qədər də yaxşı bilməyən səyahətçilər üçün əlavə çətinlik yarada bilər.
Həmçinin hər üç ildən bir götürülən barmaq izləri və üz skanları kimi biometrik skanlara öyrəşməli olan səyahətçiləri maarifləndirmək lazım gələcək. Bu məlumat interpol xidmətləri üçün əlçatan olacaq. Yeni sistem məlumatların qorunması və məxfiliklə bağlı suallar və narahatlıqlar yarada bilər.
