ABŞ-ın Auqusta Universitetində aparılan araşdırma göstərib ki, D vitamini əlavələri qocalmanı yavaşlada bilər.
Baki-baku.az “sciencealert.com” saytına istinadla xəbər verir ki, alimlərin müəyyən etdiyinə görə, gündəlik 2000 IU D vitamini (50 µg) qəbul etmək xromosomların ucunda yerləşən telomerləri qoruyur. Telomerlər hüceyrələrin bölünməsi zamanı DNT-ni zədələnmədən saxlayır və onların qısalması qocalma prosesinin əsas göstəricilərindən biridir.
Beş il davam edən araşdırmada orta yaşı 65 olan 1031 nəfər izlənilib. Nəticələrə görə, D vitamini qəbul edənlərdə telomerlər daha yaxşı qorunub. Bu fərq, qocalma ilə əlaqəli xəstəliklər – ürək-damar problemləri, xərçəng və oynaq xəstəlikləri riskinin azalmasına işarə edə bilər.
Mütəxəssislər bildirirlər ki, D vitamini həm sümük sağlamlığı, həm də immun sistemi üçün vacibdir. O, bədəndəki iltihabı azalda və infeksiyalara qarşı qoruma təmin edə bilər. Bununla belə, alimlər xəbərdarlıq edirlər ki, yüksək dozada vitamin qəbulu düzgün deyil. Optimal miqdar fərdin sağlamlıq vəziyyətindən, qidalanmasından və mövcud D vitamini səviyyəsindən asılıdır.
Həkimlər vurğulayırlar ki, sağlam qocalma üçün ən təsirli üsullar hələ də balanslı pəhriz, müntəzəm fiziki aktivlik, keyfiyyətli yuxu, siqaretdən uzaq durmaq və stresi azaltmaqdır. D vitamini bu prosesdə əlavə dəstək ola bilər.