Dənizkənarı Bulvar İdarəsi (DBİ) 2023-cü ili 2,613 milyon manat mənfəətlə başa vurub.
Baki-baku.az qurumun maliyyə hesabatına istinadən xəbər verir ki, bu, 2022-ci illə müqayisədə 25,6 dəfə çoxdur.
2023-cü ildə DBİ-nin əsas əməliyyat gəlirləri 19,712 milyon manat (2022-ci ilə ilə nisbətən 1,6 % çox), insan resursları üzrə xərcləri 11,811 milyon manat (4,3 % çox), amortizasiya və köhnəlmə xərcləri 1,725 milyon manat (19,3 % az), digər əməliyyat xərcləri 3,559 milyon manat (39 % az), xarici valyuta əməliyyatları xərcləri isə 4 min manat (əvvəlki il gəlir olub) təşkil edib.
Ötən il yanvarın 1-nə DBİ-nin aktivləri 373,596 milyon manat olub ki, bu da illik müqayisədə 3,9 % çoxdur. Hesabat dövründə qurumun öhdəlikləri 64,1 % artaraq 24,042 milyon manata, balans kapitalı isə 1,4 % artaraq 349,554 milyon manata çatıb.
Xatırladaq ki, DBİ 2008-ci ildə yaradılıb. Onun nizamnamə kapitalı 65,211 milyon manatdır. İdarə Dənizkənarı Milli Parkın, Dövlət Bayrağı Meydanının, Dövlət Bayrağı Muzeyinin mühafizəsi, onların ərazisinə nəzarət və onların idarə edilməsi, saxlanılması, cari fəaliyyətinin və perspektiv inkişafının təmin edilməsi sahəsində fəaliyyət göstərən publik hüquqi şəxsdir.
