“OpenAI” şirkəti məşhur süni intellekt platforması “ChatGPT”nin desktop və mobil versiyalarına valideyn nəzarəti funksiyası əlavə edib.

Baki-baku.az xəbər verir ki, bu barədə məlumatı “Reuters” agentliyi yayıb.

Yeni sistem valideynlərə yeniyetmələrin platformadan istifadəsini daha təhlükəsiz şəkildə izləməyə imkan verəcək. Belə ki, valideynlər həssas məzmunlara girişin məhdudlaşdırılması, söhbət tarixçəsinin yadda saxlanılması funksiyasının idarə olunması kimi imkanlara sahib olacaqlar.

Qeyd edək ki, bu nəzarət funksiyası valideynlərə uşaqların konkret söhbətlərini oxumağa imkan verməyəcək. Yəni, balanslı yanaşma qorunaraq həm şəxsi məxfilik, həm də təhlükəsizlik təmin olunmağa çalışılıb.

Bu addım, süni intellekt texnologiyalarının ailə mühitində daha təhlükəsiz və nəzarətli şəkildə istifadəsini təşviq etmək məqsədi daşıyır.